結果計劃還計劃，一嚟就急到瀨；苗本身係百無禁忌、破日都唔介意結婚搬屋嘅人，之不過長老都度咗通勝期，孝子賢孫梗係跟啦！於是就連阿媽都一齊幫手，發癲咁搵場地！
苗嘅家人圈、朋友圈、同事圈都散佈全港九新界，諗一諗都係油尖旺最方便，於是搵咗幾間，去現場睇睇，覺得都係酒店好，畢竟南嘅陪嫁……啊唔係，係陪娶團，點都要住宿，於是乎喺幾乎無得揀之下、再有限度精挑細選，就扑錘一間酒店嘅場地，終於有覺好瞓！
然後book化妝、婚禮攝影，一切都好順利，果時仲唔係太記得日期係幾號，每次都話係出年十月嘅最後一個星期六，次次都同對方sales睇日曆～
如是者又兩、三個月，輪到苗去台灣搵南，今次多咗個任務：搵婚紗攝影
事關攝影呢家嘢，人重要景更重要，苗同南中意大自然，台灣最多啦，所以又無交嗌，好快速就決定喺台灣影。
因為若講話喺香港影，其實借架車、淘寶套婚紗，苗嘅朋友圈中就有攝影師同一大堆小幫手可以協助，唔需要搵婚紗攝影；婚宴當日有搵婚禮攝影，都係因為想朋友們果日盡情盡慶啲，好好enjoy。
咁樣去一去，先發現台灣三個同香港完全唔同嘅現象
第一，婚紗攝影原來包借婚禮當日嘅婚紗，而且可以借兩次，每次一星期！代表香港婚宴同台灣婚宴嘅婚紗都唔洗租！
第二，婚紗攝影包成世！有咗呀？免費同你影多次！小朋友出世呀？再免費影多次！又有咗呀？再嚟啦再免費影！至於啲相價錢點計？你婚紗攝影點計就點計！所以如果買個相片全包嘅貴plan，就一樣相片全部免費！不得了！真係做爛市！
第三，台灣有樣更頂爛市嘅嘢叫做「七天鑑賞期」，俾晒錢拎咗返屋企都可以退貨，婚紗攝影自然都有冷靜期，如是者晏晝喺Ａ婚紗碌咗卡，夜晚屎忽痕睇多間Ｂ婚紗，覺得Ｂ婚紗實在太正，就對唔住Ａ婚紗、第一次面皮成呎厚咁去做咗退款。
就咁基本上大件嘢都塵埃落定，剩返啲細節嘢就慢慢再搞。
以為一切都咁順利嘅時候，就出事了……
首先爆破嘅，係計錯賓客人數，結果場地唔夠大！
然後就係同化妝姐姐一齊睇錯日期，訂單就錯咗日期！
最大鑊嘅係婚宴前一日，南拎咗婚紗嚟香港，俾我一試……唯一果件白色婚紗著唔落！！！
雖然已經搞緊結婚，但事實上，苗同南仲未討論結婚後嘅生活。
我哋有查過資料，知道香港拎身份證要七年經常居港，而台灣就只要結婚三年、兩年內居留達183日，換言之台灣嘅入藉資格係比較寬鬆；如果去台灣就唔需要咁急，但如果嚟香港，七年真係超長，要就真係趁早唔好拖！不過講到尾，我哋自然係無結論，原因都只係心裡面大概已有個答案，而果個答案係可以拖，所以就繼續拖。
「閂門啦，同妳傾傾！」影婚紗相之前一個禮拜，當我拎嘢入老世房嘅時候，俾佢叫住咗我：「妳都做咗好耐，做得好好，今年我識做，會幫妳積極爭取！」
薪酬我年年都有增長，所以老世講嘅積極爭取，自然係指升職；當時我嘅職位再上去就係senior，呢個title喺果間幾百人嘅公司入面，數一數唔到十個人，非常珍貴。
公司升職一般都係喺十二月annual dinner果一日公佈，如果真係升職，而我又要辭職搬去台灣嘅話，等於升職幾日就要辭職唔do，都真係幾玩嘢。不過事實我又真係乜都未決定，無理由透露「可能」嘅計劃嚟斷自己米路，於是感恩老世讚嘆老世，就繼續吹水。
「老世，下禮拜我放假，有無咩要幫妳整定呀？」
「去邊呀？」
「台灣」
「又去？識咗台灣男朋友呀？台灣男人打老婆㗎喎！」
「唔係化？咁搞笑！」差啲俾人篤爆，唯有哈哈哈以笑帶過就算！
話說當你親眼睇過同一職級嘅同事可以優渥地順利退休，就知道呢份工真係可以安心長做；而我呢個老世，磨合幾年過後已經成為最佳拍擋，佢又肯定唔會走嘅，代表我就算無辦法更上一層樓，都至少可以繼續同一工作模式直到佢退休，先至要轉跟第個老世，到時我已經係超級老屎忽，新老世都會俾幾分薄面、唔會太難做。而呢一刻，喺我已經乜都上晒手、上鍊一樣幾乎乜都自動波，工作量叫做啱啱好、加班唔算多嘅情況底下，其實份工真係幾爽皮～條件咁好令人難捨難離，我就更猶豫婚後生活究竟要點樣抉擇。
飛台灣之前一日，可能有啲壓力啦，我開始出風癩（蕁麻疹）……
不過因為婚紗要先試身，所以距離攝影仲有兩日時間，一方面等風癩過，一方面就可以去睇吓台灣嘅婚宴場地，最後確認台灣婚宴日期係三月，換言之，若移民台灣，時序的確係十二月底辭職、一月初搞良民證、一月底離職、二月初去台灣搞居留，搞完就可以忙台灣婚宴嘅事；反之移民香港，時序就係香港註冊後去辦受養人來港居留、有證後來香港搞居留、三月台灣婚宴之後賣樓，賣到就辭職搬嚟香港，左度右度，時間都係遢遢陷！
咁搞法，真係都要坐低傾一傾！傾傾大家移民可以搞乜，若果南嚟香港，其實我公司都有職位適合佢，但前題當然係要有空缺；語言嘅話南真係好勁，已經聽明八成廣東話，嚟香港再練下、開口講下，應該好快就無問題。不過嚟香港有樣煩，苗同妹妹一齊住，短暫都可以繼續住嘅，但長遠一定要賣台灣樓再買香港樓，加上裝修、傢俬乜乜物物，煩爆喎！
至於苗去台灣嘅話，就可能要換工種啦，因為我嘅專業喺台南唔多，之前嘅工作經驗全部唔計數，就等於重頭嚟過，薪酬睇怕對半再七折，心理極不平衡，兼分分鐘搵唔到工！不過至少去台灣唔洗煩買樓，因為南已經買咗樓、自己獨居好幾年了。
傾咗咁耐，就知道實在無辦法用邊一邊比較好生活嚟衡量，因為兩邊都真係好茫然……唉呀好煩呀！於是講咁耐，又無結論！
臨瞓前，風癩出到個嘴都腫埋，好似俾隻大蚊咬咗一啖咁！即刻用冰敷敷，祈禱聽朝婚紗攝影化妝時，可以消腫啦！
感謝上帝，第二日化妝嘅時候風癩就消晒！於是好順利咁跟住攝影師同助理玩足一日，大家都energy爆燈又興奮，由朝影到黑，返到大本營淨係用相機個屏幕睇相已經覺得靚靚，心滿意足～
不過正能量一日之後，就負能量湧出，第二日風癩又返嚟，由香港跟去台灣、又由台灣跟我返香港，糾纏咗我起碼三個月，證明真係壓力山大，畢竟苗同南嘅結婚唔止代表進入人生另一個階段，更係代表其中一個人嘅人生要重零開始，所以當壞事「爆破」出現時，苗就第一次體驗到咩叫壓力大到「被鬼砸」！
化妝訂錯日期算係小事，化妝姐姐介紹friend俾我就可以解決，比較大件事嘅係場地唔夠大！至於點解會唔夠大呢家嘢，緣起緣滅、皆有定數，既然有難關就拎起把刀過關斬將啦，無謂計較前塵往事！即刻打電話問酒店，大檸樂，其他宴會廳都已經book爆！換言之只有兩個選擇，一係硬食，一係撻訂換第個場！撻訂都幾入肉，所以不在考慮之列……再次電話確認、計計數、左度右度，真係唔得喎，足足少咗三圍枱！但係呢啲嘢，只能夠自己度掂佢，最後手段咪唔請同事囉，再呢度減啲果度減啲，無咩係唔得嘅……
就喺第二日嘅早晨，大清早就自然醒，想擘大眼但用盡力都係得返矇矓一線；耳邊好嘈，唔係講嘢聲車聲或者可以認得到嘅聲，比較似電器震動、扇葉「洪洪洪」咁嘅迴響聲；至於身體……不得了！真係無辦法郁！想遞起隻手、用盡力都郁唔到半隻手指！
呢吓我就知道，一定係俗稱「被鬼砸」嘅「睡眠癱瘓症」，聽講係因為意識雖然醒咗，但肌肉仲好攰咁瞓緊未醒，所以就出現呢種情況，係其中一種可以感受到死亡無力嘅體驗；呢啲位，苗又點會認輸？心入面諗住頂丫，嚟呀隻揪！未驚過！一下子郁到條頸，就連帶成個人坐咗起身！不過咁樣一玩，就知道唔多掂喎！要諗辦法舒舒壓先得！
於是就約咗幾個老死去渡假屋兩日一夜，呢間屋四條女，一個準婚、一個準分、兩個單身，隔離屋四條仔status unknow，只要年紀差唔多，由唔識到一齊玩又有幾高難度？入屋放低嘢出嚟，就已經撩起咗一齊去沙灘玩……
一開始只係抱住幫單身好姊妹嘅心態，但當發現四條仔似乎已經傾掂數、一人一個目標嘅時候，我好快就已經同呢個以我做目標、叫做阿賢嘅男仔表明，我年底就結婚、無諗住要撞車。
啱啱玩完水，我哋兩個人都由頭濕到落腳，阿賢笑出聲話：「洗濕個頭喎」
「好濕，不過幫下手啦，果邊三個都追得㗎！」心念一轉，唔對路，即刻提出警告：「喂！你地咩status？非誠勿擾呀！」
「妳咁直，咁我都坦白啦，果三個都堅單身嘅，我呢，都係年底結婚」
「頂丫，著埋同一條褲添」
「嗱！扮無事發生，費事做電燈膽啦！」
「你贏！喂，咁你搞掂晒啲嘢未呀？」
「咩嘢呀？」
「婚宴囉仲有咩呀？」
「落咗訂啦，無咩好搞，等派帖啫……」
「咁你梗係隊晒俾未婚妻搞啦，結婚咁大件事，點可能無嘢好搞㗎？」
阿賢諗咗陣先答：「真係無喎！」
「咁你梗係隊晒俾未婚妻搞啦，結婚咁大件事，點可能無嘢好搞㗎？」
阿賢諗咗陣先答：「真係無喎！」
果下有少少慶，我就開始一輪嘴咁問佢：「訂咗酒席就ko啦？褂呢？衫呢？姊妹衫兄弟衫、襟花手花棒花？父母著咩衫？利是呢？上至開門利是下至派俾各侍應生果封你都要諗！日程安排呢？朝早幾點化妝？要唔要化埋姊妹媽媽同奶奶？幾點接新娘？lunch邊度食？玩唔玩回門？定係去邊度影相？要唔要車？架車租幾點至幾點？幾點到場地？安排邊個斟茶邊個收禮邊個坐reception邊個坐邊圍？」
理所當然，阿賢被我問到口啞啞，每一個都一係擰頭唔知道、一係就凸眼O嘴！唉男人，真係抵俾我寸：「咁乸多嘢你竟然話無嘢好搞？」
「係喎……我錯囉……」
「返去自己跪玻璃啦！」
「喂！」阿賢望住個海，令佢呢一句好似同緊佢未婚妻講咁樣：「男人無咁細心，諗唔到咁多嘢，女人仔，要同男人講，等男人幫妳」
我哋呢一代港女嘅教育，都唔識分究竟係成功定係失敗，獨立自主，工作能力太勁、乜都可以攬上身，太習慣嘅時候，反而唔識得求救！
南的確係喺台灣，所以成個香港婚宴只能苗一個人搞，但係南真係無嘢可以分擔咩？阿賢一句點醒咗我，唔係㗎，就算南咩都做唔到，都係有佢可以分擔嘅嘢㗎，我可以同佢講化妝師約錯時間、可以同佢講場地唔夠大，我係可以話佢知我有咩煩惱、等佢安慰我㗎！
夫妻咪就係要咁樣囉！唔一定有實質可以幫助到對方嘅地方，但係可以互相傾吐煩惱、互相安慰支持。點解會唔想講俾佢知？覺得麻煩到佢、令佢擔心？講到底，或者係睇低自己，覺得自己唔值得麻煩佢、叫佢擔心！好傻豬，但係人有時就係咁，覺得都可以承受嘅，就屈住喺個心度，唔知道積壓落嚟、係會爆！
要多謝阿賢，醍醐灌頂，記返起最簡單、但好容易忘記嘅嘢，話說如果我男人咁樣同我講嘢，我都真係sweet爆，幾苦都挨得過啦！既然阿賢衰咗、無細心幫未婚妻搞婚禮，就等我幫吓佢啦：「喂真心型喎，不如你講多次，我錄起佢，等你send俾你老婆仔，佢實冧到爆呀！」
「頂！接唔到！」尷尬一笑，阿賢遞手托住個頭，真正坦白：「我無㗎，我亂噏㗎，我以為妳唔嗒我糖搵借口迆我，點知妳真係待嫁新娘，好乸hurt呀」
呢個位，我諗我一定係成面寫住WTF，堅係咩粗口都出晒嚟……
關係其實就好似長途旅行，係開心快樂、定係驚心動魄，除咗睇吓遇到啲咩事之外，兩個人嘅心態係非常重要，重點係，有無一齊去經歷、雙方互相討論互相分享？
經歷種種之後，又究竟有無共同成長？
重視一段關係，就必須要理解對方諗咩，就算嘈交都真係唔緊要，緊記抱住一個「愛」而唔係「害」嘅出發點，就會知道人嘅話語每每有待改進，但絕對無心傷害！好好講話、好好聆聽，幫助對方講出心入面最真實嘅想法同感受，大概呢一個先至係一段關係可以長長久久嘅方法。
所以下一次嘅視訊約會，苗一下子就將所有苦水吐出，令南好擔心，但係㗎，佢係新郎，佢係真係要幫手擔心㗎！而且佢要負責安慰同幫手諗辦法，一個人無辦法，兩個人共同承擔，就連撻訂都瀟洒啲呀！不過又感謝上帝啦！最後竟然係人哋撻咗訂，吉咗個場出嚟俾我哋換個大場！結果就順順利利，終於到咗結婚前一日，面對婚前最後一個難關：
唯一果件白色婚紗……胸圍車細咗2吋，著唔落！
衫既然係台灣婚紗公司提供，所以係由南喺台灣拎過嚟，換言之，無得拎返去叫佢改！
撞鬼勒已經唔係有胸！你車大2吋我最多塞棉花嘅啫！少2吋我連拉鏈都拉唔埋！
即刻投入南嘅懷抱帶淚求安慰，而南亦好型咁話：「錢可以解決的就不是問題！」
狗衝去借褂借媽媽衫果間舖，佢哋一睇即刻拍心口、三小時起貨，非常高效率！！！
於是第二日結婚，好順利咁就嚟到宣誓：
我請在場人士見證，我願意娶／嫁你作為我的妻子／丈夫。從今時直到永遠，無論是順境或是逆境、富裕或貧窮、健康或疾病、快樂或憂愁，我將永遠愛著你、珍惜你，對你忠實，直到永永遠遠。
好鬼老土，但細嚼慢嚥，裡面學問真係高深！
感謝大家睇到呢度~
然而，世事梗係無王子同公主永遠幸福快樂咁生活落去啦！！！
所以除咗甜蜜之外，當然仲有好多胡鬧嘈交，嬲到震嘅事！
婚姻嘅哲學真係一世都畢唔到業，南，我地一齊加油吧！
（完）
🔔🔔🔔苗的700公里的距離完結了！在香港長大的妳，與台灣男生有段情？還是將要或嫁來台灣？妳想分享妳的故事嗎？Facebbok私訊給苗，讓苗為妳寫成「她的700公里的距離」！❤
她的700公里的距離－遠距離戀愛真人真事改編(不定期更新)
這裡的故事，全都是真人真事改編、有關遠距離戀愛的故事！
