第06～10集：https://goo.gl/6L86yt
跟住前面嘅電單車剷上船，樓上係客座，呢一層就一片空並無座位，搵咗個位停好，就熄匙落咗腳架，繼續坐喺電單車上面，除咗頭盔，但我地都無除口罩，因為陸續仲有電單車上船，氣味非常難聞；我就稍稍用力、一隻腳跨返嚟打側坐，只係電單車嘅座位係向前斜，所以地心引力令到我一邊手臂稍稍挨住咗謎謎背脊，謎謎亦都好有紳士風度，直咗腰板任由我借力。
話題本來滔滔不絕，但係呢一程好似尖沙嘴去灣仔咁只有幾分鐘嘅船，我地兩個都戴住咗口罩無講嘢，不過好奇怪，完全唔覺得尷尬，就好似已經識咗好耐嘅老朋友，靜靜睇住船開，與碼頭越嚟越遠，跟住又睇到我地頭先去過嘅打狗領事館，果條紅色磚牆嘅迴廊，就係我地兩個講殺頭都講得好開心嘅地方，不自覺嘴角上揚微笑；好奇謎謎呢個時候，究竟係度諗緊啲乜嘢。
落船之後買咗兩杯嘢飲，就直衝直至見到海灘先左轉，謎謎先又開始講故事，講下呢個黑沙灘，又好難得咁坦白感情世界，話呢個係佢初戀發生嘅地方。
遠離咗沙灘，我地先落咗車，一邊飲嘢一邊迎著風並肩而行。左邊係舖砌得好靚嘅公園廣場，有啲小朋友喺度追追逐逐，佢地嘅家長就休休閒閒坐喺一邊傾計；望向右邊係藍色嘅汪洋大海，謎謎話若然有千里眼嘅話，應該可以睇得到香港；前面無幾遠有幾個米黃色嘅面海大風車，海風吹得它們轉個不停。行到去風車前面，好自然咁就坐咗響下面嘅梯級，望住海浪翻騰、休息一下。
「好巧，我初戀也是在海灘」聽到我咁講，謎謎應該係覺得嚇咗一跳、身子一顫，稍稍側頭望住我，我都側頭微笑回望，代表「我明白果種感受」，尤其係初戀消逝過後，每一次睇到海灘，一定係回憶來襲、心中五味雜陳！
只係呢下對望，忽然覺得有陣「曖昧」味！即刻迴避佢視線、轉頭睇海浪，解釋落去：「睹物思人，這人之常情嘛，我懂的！就輕嘆口氣，想些開心的事」
安靜咗陣先聽到鼻噴氣嘅聲，謎謎輕鬆笑咗：「我還以為妳準備要講情史」
「欸！講歷史這工作留給你好了」出於禮貌，轉頭我又望返住佢：「我不擅長講，但我擅長聽故事！」
「好巧，我擅長講故事！」回復到正常嘅氣氛，兩人露齒而笑，我出題要謎謎給我講最古老王朝嘅故事，佢也不負所望，竟然能講到美索不達米亞去，我諗我當下一定雙眼都發光咁望住佢，對住呢個男仔，我要叫聲師傅！
離開旗津，謎謎就送我返到高雄車站，搵咗停車位停車，又堅持送我上火車。台灣嘅火車站，有一種車票叫做「月台票」，就係為呢啲送別嘅人而設。
睇住火車到站，我今次無咁蠢啦！睇清睇楚再三確認無企錯車卡，謎謎都有幫我睇，肯定無錯！趁住人人魚貫上車、仲未開車嘅時間，我地最後道別。
「今天超感謝你！很開心！」
「我也很開心！妳什麼時候再來台灣，一定要來找我！」話說香港台灣好近，高雄又有機場，要嚟容乜易？只係旅行都好少話好似今次咁，有「沒有旅伴嘅時候」，所以其實呢一別，大有可能係後會無期……
我地兩個人心裡都清楚，今日絕對係個開心嘅回憶，就算十年、二十年後，都一樣會記起、一樣非常開心，哪怕到時，早已忘記咗對方個樣……
「對耶！來個合照！」說著趕快拿出相機自拍，謎謎都即刻靠近我露出笑容，「咔嚓」一聲，攝下了兩人第一張合照。
轉身跳上車就企喺門前，答應謎謎盡快將張合照傳俾佢，火車就閂車門，透過玻璃同佢揮手，個傻豬竟然跟住火車行咗一段，直至速度越嚟越快，無法步行跟上先至唔再跟上嚟……
坐低喺座位，謎謎頭先追火車嘅樣不斷喺腦入面重播，我回想自己當下究竟係咩表情，同埋係唔係今日好唔覺意咁、將啲錯誤嘅訊息俾咗謎謎……
實情係，對中意聽故事嘅我嚟講，「說書人」應該非常有吸引力先係，但一來我未結束同男朋友嘅關係，二來謎謎年紀比我細兩年，我起手就當佢係弟弟，完全無諗過佢會係一個對象，就算經過今日半日，頂盡都只係多個「師傅」嘅諗法；若然佢同我一樣單純，當我姐姐，或者當我係個「故事聆聽者」，應該不至於要追火車……
所以，眉頭一皺……覺得大鑊，案情並唔單純！
男女之間唔通真係唔可以有純友誼？不過，我其實已經無力去思考其他人諗咩，呢次陪人陪嫁之旅，正正係自己感情嘅一個假期，諗清諗楚同男朋友嘅感情該如何終結，然後做一個自己唔會後悔嘅決定，同埋要點樣小心處理果個決定。
至於謎謎，若然我令佢誤會，或者唔小心撥咗佢某條心弦，我諗只要我唔再出現，就應該咩事都無。打從心底同佢道歉，苗姐今日真係太打擾你了⋯⋯
返到台南，直接去咗婚宴場地，完晒成個婚宴，先至八點鬆啲！比著香港婚宴，八點起到菜已經偷笑啦！
不過因為咁，今晚我同小櫻先有得下半場！
返去旅館等小櫻換件衫卸個妝，就一齊落樓，時間計得啱啱好，出到馬路邊就睇住阿安將電單車塞入停車格。
簡單介紹一下之後，小櫻已經急不及待走出去截的士，阿安先至轉頭問我要去邊，香港人嚟台灣，夜晚黑仲有邊度想去呀，梗係夜市啦！
見我想幫手截車，阿安一手捉住我手袋條肩帶，稍為烏塊面埋嚟，嚇得我瞪大咗眼望住佢，一日唔見啫唔係咁狼吓化？即刻臉上一熱、心跳加速，猶豫係唔係要起手升巴佢！佢先至面唔紅耳唔赤咁講咗句：「妳化妝啊？」
琴日曬傷咗面紅紅，唯有整個小眼妝配合，戴隱形眼鏡、翹咗眼睫毛。
「嗯！這樣比較好看！」
頂你！本小姐就係懶化妝！外貌協會去死！見小櫻已經截到的士，我推阿安一嘢叫佢「閉嘴！上車！」，佢就一副計劃成功嘅樣哈哈哈咁笑到肚痛。
台南夜市並唔係固定每晚都喺同一個地方，面積最大嘅「花園夜市」，只有星期四、六、日先至有，而咁啱，果日就係星期四，的士停低嘅時候，已經繞咗半個夜市外圍，真係超級無敵大！
我地三個人吃吃喝喝行咗好耐，成程基本上一係我同小櫻廣東話搏命講，一係我同阿安國語一堆，小櫻同阿安你眼望我眼只能零溝通……未行晒個夜市，隻腳已經攰到爆，就放棄去坐的士返咗旅館，喺門口道別。
「安安，我們明天一早就離開台南了」
「好好叫我名字！我叫沈柏安！」
無諗到忽然間知道阿安個全朵，仲要竟然同我琴日形容佢嘅「沈郎腰」完全百份百吻合！話我知，我係咪開竅咗某項特異功能？！「你居然是沈郎？！」
「演哪齣呀沈郎？」
「古代美男子沈約、潘安都在你名號下，演哪齣你導演呀！」
阿安沒好氣，不過笑容燦爛，經過呢兩日，佢應該都知道我係某種重症病患，鬼想法一籮筐、天馬行空，最中意就係喺內心鬼叫。
彷彿決意要道別，阿安後退咗兩步，微笑噴口氣，說：「妳們小心囉，玩得開心！」
就咁樣揮揮手各自轉身，亦無留低任何合照，諗住大概就後會無期……
而家諗返起，當時真係應該轉身就倆倆相忘，唔好再製造任何新嘅記憶，就會係對方最好嘅回憶了！但係偏偏，就咁開始咗玩追追逐逐嘅遊戲，仲將謎謎都牽扯咗入嚟……
離開台南之後，我同小櫻仲有四日喺台灣，南下墾丁，最後北上，由台北返香港。
從二、三十度嘅台南落到去墾丁，竟然遇著冷鋒，去到台北淨返十度，上去101大樓吹到起晒雞皮、頭髮亂了，但心明確了，真係要快刀斬情絲，不為別人，純綷覺得放生對我同男朋友都係一件好事。
於是返到香港，第二日就正式將男朋友變成前度，而呢齣分手戲碼，因為果位男朋友一直懵懂、未有察覺暴風雨前夕，令佢感到莫名奇妙，就斷斷續續咁糾纏咗差唔多一個月，想求一個「為什麼」。但其實喺分手之前，我已經提出過Ｎ次我地有問題，佢根本知道點解，所以我唔想赤裸裸再補一刀，一擊傷殺佢自尊心加自信心！反正點樣都好，佢都無可以阻止嘅理由，只能夠慢慢心死、退出各自嘅生活圈。
因為放假將工作放低咗十日，返到公司枱面文件堆疊如山，瘋狂加班、忙到爆炸；工餘又都有好多事情要處理，當然無力氣處理生活圈以外嘅事，所以都無主動同阿安或者謎謎聯絡。
果陣時智能手機未係好高能、未有通訊APP，聯絡仲係玩緊有字數限制嘅手機短訊(SMS)，而呢個手機短訊係一種高消費活動，因為每一則都要俾錢！海外短訊就更多錢！！
果一個我喺工作、感情兩頭困擾嘅月份，就開始收到阿安嘅手機短訊，每每見我忙到幾日無上網，佢就會發個短訊關心，讓人心頭一暖。
至於謎謎，就一直都係安靜狀態，我唔會搵佢，佢亦無主動搵我；直至我煎熬咗一個月、比較可以身心舒緩嘅時候，終於得閒處理一下旅行相片，睇見同謎謎影嘅合照，猶豫一陣，捉住滑鼠嘅手一點一轉、丟咗俾謎謎，先再次同佢傾咗幾句一般社交談話，彷彿果日追火車嘅事情，從未發生。老老實實隔咗咁耐先聯絡，仲要只講無聊嘢，謎謎邊有可能有咩感情諗法，一定係我諗多咗！果然，果次之後我同謎謎就進入咗零溝通狀態……
時光飛逝，經過大半年直至年底，竟忽然收到謎謎嘅手機短訊，問我香港同上海嘅生活。見佢一改習慣棄用電腦通訊軟體，仲以為佢好急，就花少少錢打咗個長途電話俾佢，原來佢有打算離開台灣深造，我住香港、工作就都係上海嘢，問我就可以一擊知道兩地，咁樣我先又開始同謎謎頻密用電腦傾計。
但同一時間，我同阿安已經用手機短訊互通咗大半年，經歷過佢失業搵工，仍然唔介意花錢繼續俾我發短訊。然後果啲佢無眠嘅夜晚，第朝我起身都會收到佢好幾個短訊，「妳睡了嗎？我失眠了」「妳是不是正在做著好夢呢？」「都夢到什麼呢再告訴我」，曖昧到不得了！有時我睇完笑笑就算，得閒先至覆佢，直到後來進展到佢會臨瞓之前發「晚安」兩個字過嚟……女人，都係中意柔情，長期甜蜜細膩終於攻破心防，發現自己開始會期待佢嘅短訊嘅時候，春天差唔多嚟了……
過年被果棵桃花打頭之後唔夠三日，阿安就問我願唔願意做佢女朋友，我即刻就沖昏頭，成就咗我人生第一段遠距離戀愛，只係呢一朵春天冒起嘅小桃花，原來係惡夢一場……
咁樣樣開始拍拖，都真係幾唔實在，距離上次見面已經相隔將近一年，又無合照，阿安又唔會擺相上網，腦袋已經有啲難刻畫出阿安個樣。我知道阿安屋企或者工作都錢唔多，唯一能見面就係我去台灣，就喺我思前想後時，阿安就給我短訊問：「苗苗Honey，妳會不會來台灣？」
於是二月初嘅一個周末，我請咗星期五半日假，瞞住屋企、瞞住閨蜜坐飛機去咗高雄，因為若俾佢地知道，無論我做咩決定都一定會鬧死我……其實我理智線就係未斷得晒，先無問過閨蜜意見，堅持自己路自己行，決定兩日都留喺高雄，死都唔會送上門去台南！咁堅持都只因為禁不住心入面果一個大問號：究竟呢段感情係現實定係遊戲？若阿安真係掛住我，想認認真真發展，買一張火車票，並不困難。
結果就喺我落機，發短訊話俾佢知我到咗高雄，收到「已讀」回函之後，手機就一直沉靜……
沈柏安，若然你係玩遊戲，何必問我嚟唔嚟台灣？你喺度玩乜嘢？！
第二日星期六，阿安放假，但繼續人間蒸發；而我都有我嘅驕傲，反正佢出現嘅話我再問都唔遲，唔出現嘅話問咩都係廢話，就唔打電話、唔發訊息，借咗架單車一人樂。
日落時分睇住夕陽西下，手機短訊提示音響起，三個字「還好嗎」，竟然係謎謎！高雄雖然係謎謎地盤，都唔洗咁好似有超能力一樣化？而且呢簡單三個字我就糊塗了，沒注意到回簡訊就會俾佢睇到來電係台灣號碼，手機馬上就響鈴，被佢強勢問到我人就喺高雄，晚餐就咁被佢拖咗去食烤海鮮，一路剝蝦一路講佢知發生乜事。
聽完之後，謎謎話：「愛情是盲目的，看不到自己做的傻事」
「《威尼斯商人》！」頂呀！講咗咁耐，我心情都係超級平靜，家下俾謎謎一撩，非常激動：「我要他還我一磅肉！」
「不可以滴血，然後要切滿一磅不多不少唷！」接得上內容，一來一回，我心情舒暢，同謎謎一齊大笑！
我終於明白點解同謎謎有老朋友嘅感覺，係因為我地有共同「語言」，實在太啱嘴型吹水！講意境、講殺頭、講美索不達米亞、講莎士比亞，能接得上話題又有幾多個人？而且呢一日，我地第二次見面咋！
「妳明天幾點去機場？」
意識到謎謎想送我去機場，覺得唔好意思，即刻推辭：「我就一個大包而已，自己去就好了！」
「欸！苗姊！讓我展示一下台灣男生的風度嘛！不是每一個都像那位沈郎一樣的！我給妳最後留個好印象！不然妳以後不來台灣，連妳的朋友都不來台灣，台灣少幾個觀光客呀？」不得不佩服阿謎嘅說服力，嘆一口氣，我投降！
只係有時一個小小、簡單嘅抉擇，真係會有好大嘅後果！果一日，從回覆謎謎短訊、接佢嘅來電、食嘅一餐飯、到投降俾佢送我去機場，每一步，我都後悔到不行……
（待續）
她的700公里的距離－遠距離戀愛真人真事改編(不定期更新)
這裡的故事，全都是真人真事改編、有關遠距離戀愛的故事！
http://miu-nan.blogspot.com/2018/07/700.html
這裡的故事，全都是真人真事改編、有關遠距離戀愛的故事！
http://miu-nan.blogspot.com/2018/07/700.html
