第06～10集：https://goo.gl/6L86yt
第11～15集：https://goo.gl/so2NJe
三日，阿安都係未有現身，雞食放光蟲，所謂「男女朋友」，只係遊戲一場。
星期日下晝謎謎陪我搭捷運，走到地面就嚟踏入機場嘅時候，正式夢碎，忍唔住感傷鼻酸，紅咗眼吸咗一下鼻水，就兩個人一齊停咗腳步……
果種感覺非常之討厭，雖則用情未深，但絕對係浪費時間浪費感情，不忿自己太天真，點解唔去相信自己身為女人嘅直覺，而去相信一個第一日見面就心知佢係一個玩家嘅人？
就喺腦內十級巨浪嘅時候，忽然被一雙大手正面緊抱，耳邊一句：「妳放心哭、放心哭」呢個動作非常自然，根本係電視劇第二男主角嘅戲碼！
呢下我先醒覺，我真係迷糊白痴到一個點！錯到離晒大譜！玩你追我逐，點解要牽扯謎謎入嚟？！
低頭後退兩步，一邊忍住後悔嘅激動，一邊講「我沒事」，本來凝喺眼框入面嘅淚水突破滴落，但已經唔係因為阿安了，而係因為我覺得對唔住謎謎！
離開高雄，就徹底咁離開咗阿安同謎謎……
後續分別收到兩個人落落長嘅電子郵件，搞到我心情又起伏不定……
阿安坦承，喺佢嘅生活圈入面，佢有更中意嘅女仔，只係關係未有好似我咁親密，思前想後，覺得免我直接受傷，所以即使星期六真係衝動去過高雄，一諗到俾唔到我佢嘅第一位，就又返咗台南……
最後仲好直接咁話，如果我可以接受做一個隱密嘅女朋友，或者將來到大家都想要組織家庭，但又搵唔到更好嘅對象，我哋再一齊，否則，佢唔敢再打擾我。
寫咁大篇未知幾分真幾分假嘅電郵，睇怕目的都係想繼續玩曖昩……對唔住我係蠢咗，但我唔會蠢第二次。從來無諗到自己會發神經為一個咁嘅人而心動，我完全心死、恨自己眼瞎了。
狠心刪除佢嘅手機短訊，每個都充滿回憶，原來唔夠一年時間，加埋竟然有四百幾個！呢個「遊戲」，佢都落得幾重本……即係咁，人生總會遇到幾個人渣，不過阿安都算係咁，佢真係大可以現身嚟做兩日戲，但佢無，將個「遊戲」留喺「虛擬」裡面玩，或者講到底玩錯「遊戲」嘅係我，係我認真咗。呢啲時候，唯有睇住春雨矇矇，整句「春心莫共花爭發，一寸相思一寸灰」，怨天怨地怨天氣，嚟安慰自己。
至於謎謎，果日睇住我滴咗兩滴眼淚之後，等我入洗手間洗完面，就咩都無講咩都無做，只係靜靜陪我去拎登機證，就簡單say bye睇住我入禁區……喺入面回頭，睇到謎謎一直不捨轉身、表情複雜，果下我先發現，
我同阿安，大概係啱嘅時間、錯嘅人；
我同謎謎，或者係啱嘅人、錯嘅時間！
打開謎謎嘅電郵，果然係一個goodbye，令一切都返唔到轉頭……
謎謎嘅電郵，表面睇係一封道別信，佢決定唔去香港、都唔去上海，一個峰迴路轉，竟然決定去英國讀書！信件嘅結尾，佢叫我好好忘記阿安，話一定有更好嘅男仔喺前面等我；而佢，就要去比較一下莎士比亞詩中嘅夏日，只係英國同香港有時差……
講到莎士比亞，就諗起我同謎謎有共同語言……英國嘅夏日就好似陽光明媚嘅春日，溫暖、舒服、惹人留戀；莎士比亞講「比較夏日」嘅詩，Shall I compare thee to a Summers day後句Thou art more lovely and more temperate令謎謎嘅電郵變得曖昧不明，容我不負責任翻譯，中文意思如下：
我能否把你比作可愛夏日？
可你比夏日又更暖人甜蜜！
如此電郵，叫無法回應佢任何感情嘅我，只能做個衰人，已讀不回……
對於謎謎，由始至終我都好無力，一個咁好嘅暖男，我係應該要俾多啲精神去處理同佢嘅關係，雖然我大概到死果刻都唔會聽到謎謎確認我有無諗錯隔離，但就算退十萬步返到我嘅第一直覺：佢係個gay，都真係唔應該拖佢落水，若然喺高雄時我有先切換發信息嘅電話卡、或者唔接佢電話、又或者穩住自己嘅情緒同佢講句「我沒事」、拒絕佢嚟陪我……一切就唔會走到而家完全返唔到轉頭。
好多感情衝擊，被傷害、都傷害咗人，真係報應。當下未能超越，陷入咗尼采講嘅「永劫回歸」，大師講嘅有分正負兩面，而頂呀我係女人仔嚟咋，當然係負面果隻，被回憶同後悔折磨到身心俱疲、想要平靜心靈，拼命塞滿時間表係最好方法！
於是喺忙到爆炸嘅生活裡面，我班咗支壁球拍返嚟，就走去學追波……結果人地雙雙倆倆報名，全班剩低我同一個叫做「阿鴻」嘅男人單丁，就局住一組一齊練，但係人地有網球底，我呢，係一個運動白痴，睇住我呢個低能，阿鴻就自動變身阿sir二號，就住我練波。
呢個男人係乜水呢？哇勁啦！佢係我人生第一個非工作上認識嘅上流社會人士，而且實屬人生勝利組，有錢有車有樓有地位，爭在，無女女！點解知道咁多？因為佢就係傳說中嘅桃花三號……話說阿鴻認真積極，第一堂放學就邀約食糖水，於是傾傾下，就咁熟咗！
「妳呀，係唔係同個波有仇㗎？」玩咗幾堂，我仍然係追波追到喘氣，無辦法控制個波嘅走向，阿鴻就笑鬼我。
「好嬲呀！唔係我玩波係個波玩我囉！」
「妳終於發現啦？」
嬲到震……不過笑還笑，佢都真係阿sir上身，明明自己都係交學費，但吸收咗教學之後，就掉轉頭嚟教我，一啲都唔介意少咗練習時間！後尾仲叫我不如試下追第二隻波，就約咗我去打網球，開始咗上堂落堂以外，更多見面嘅時間。
另一方面，經歷咗一大堆亂象，點都要同閨蜜們坦白，阿寶聽完，知道我唔多「妥」，就一嘢買咗三月來回高雄，仲有六月來回大阪機票，準備捉我去散心。點知三月由高雄去阿里山，因要穿過台南帶嘢俾小櫻陪嫁嘅過海新娘，結果又約咗另一個無咁熟嘅網友出嚟做司機……而佢，就係故事嘅終極男主角、第四朵桃花：阿南。係！又係台灣仔！我承認我賤格，衰一次、衰兩次都唔夠，要衰夠三次！
當妳同一個人初次見面，妳唔可能會知道，果下就係妳邂逅另一半嘅時刻。
我都唔例外，尤其係，我只係好衰格，咁搵阿南做柴可夫……
「妳去台南，找阿南載妳阿！」台北美女曼曼呢一日又嚟咗香港出差，同佢一邊食飯、一邊吹水，講到我下個禮拜去台南，煩緊喺市區要搭咩車嘅時候，就忽然爆咗個從未聽過嘅名字，原來，係我地一齊玩線上遊戲時，果一個同我有時差嘅公會會友……
「啊遊戲不是女角嗎？又是男生用女角？！」
「是呀！妳好像跟他不熟吧？」
「是根本沒兩句！他好像都白天才上線的！」
曼曼笑著解釋：「他那時工作要上大夜班，白天才下班玩遊戲，妳當然碰不到！」
「這樣找他載不太好意思呢」
「他人很好，妳就儘管找他幫忙吧！」
曼曼雖然係網友，但佢會嚟香港出差，已經見過好幾次面，我同小櫻去台北都有搵曼曼食飯，所以同佢建立咗真實嘅友誼，對佢投以信任一票，就聯絡咗阿南，果然同曼曼講嘅一樣，阿南一口就答應，於是三月嘅一個下晝，我同阿南第一次見面。
台南市係唔係一個專產高人之地？眼前呢個男仔，又係1米8！喺7-11門外向我走近，感覺佢同阿安一樣，只要丁起對腳，頭就會撞到門框！著住長袖薄裇衫、下身配一條牛仔褲，係咪好熟口面呢？係！根本謎謎style！超高鼻樑讓輪廓分明，烏黑頭髮，不過頭髮長咗少少，拎條橡筋應該紮得起，咁唔通又係搞文藝？
「歡迎來台南！」同阿安一樣嘅開場白，卻同謎謎一樣有把攝人魂魄嘅迷人聲線，我打咗個冷震、毛管都棟起晒！呢位帥哥，一下子就撩起咗我好多好多記憶，腦袋即刻就跑出「危險」兩個字！
「來，上車吧！」遞頂頭盔俾我，阿南坐上佢嘅摩托車，點知我坐上去都未扶穩，車已經郁啦，搞到我失儀尖叫一聲……
「怎麼了？！」
車停驚魂也定，我先發現自己雙手已經抱住咗阿南，不得已只能繼續了：「嚇到了」
「我更怕好不好？我載著兩條人命呢！」的確有道理，呢條仔，大概理智行頭，但係溫柔係咩呀？睇怕丟咗十世。
果日我同阿寶有唔同目標、分開行動；而搵阿南做司機，就係希望佢載我去火車站嘅新光三越搵阿寶，之但係阿寶申請果張台灣電話卡竟然打唔通，望住新光三越個水牌靈魂出竅……點搵呀？！
「去櫃檯喊廣播呀！小寶寶請到1樓服務櫃檯，妳的家長在那邊等妳！」
乜鬼嘢？！搵唔到閨蜜我已經精神緊張，邊有心情玩？！睇住阿南一臉興奮，果隻腳一路向服務櫃檯移動，我忍唔住一手扯住佢隻袖，拖咗佢入升降機，因為感覺佢真係會走去同服務小姐講我地要尋人！
慘啦，遇著個搞事嘅，而且唔止搞事，仲搞爛gag，搞到我噗一聲笑出嚟！
升降機入面有個電梯小姐，每停一層就會稍稍走出去喊「電梯往上」，阿南就喺我耳邊講：「去按關門把她關在外面！」
唉呀！精神緊張一下就放鬆咗！個gag係爛，但佢又幾有辦法喎！
開始對阿南改觀，係嘅，佢唔係阿安、亦唔係謎謎，係另一個有血有肉嘅人，就好好傾計，享受呢一兩小時緣份，然後記得記得，唔好重蹈覆轍，轉身就好倆倆相忘啦！
果陣又邊會諗到，阿南竟然就係我嘅未來老公呢？
睇住阿南好似個大佬一樣，主動幫我地向電訊公司小姐查詢處理我地張台灣電話卡，就覺得話阿南丟咗溫柔，的確係我太過武斷。
憑住閨蜜嘅直覺，喺書店搵到阿寶，就三個人走咗入電訊公司；當時嘅電話儲值卡，原來要等一輪先至會開通，所以先至用唔到！
阿南了解過後，再三請電訊公司小姐跟進，先至放心咁帶咗我地去食下午茶。
阿寶唔同小櫻，佢普通話非常吹得，於是就咁兩女一男天花亂墜，上天下海吹咗一輪水之後，忽然就講到六月大阪之旅……
「去日本旅遊蠻不錯，我前陣子才剛去完名古屋，很棒！」
回應阿南，阿寶問佢：「啊你有沒有去過大阪？」
「沒有呢！應該也不錯吧！」
「不然一起去呀！」
聽到呢一句，我瞪眼打個突，不過擺明吹水，唔抹嘴係常識……
「好呀！我看看有沒有假期」
真係山草藥，噏得就噏！睇住阿寶俾阿南記低來回日期同航班編號，我白眼反到後腦去，諗住反正吹水都係求盡興，不必認真，是旦啦！
如是者，食完吹完，阿南陪我地行到火車站，睇我地入咗閘就講再見，以為唔會有下文，點知，阿南認真咗，過咗無幾耐，真係買咗機票，出發日本之前一日嚟香港，匯合我哋一齊去大阪……
知道呢個消息之後，我打電話俾阿寶爆咗一輪，我個靜心trip trip呀！我個暮鐘晨鼓呀！我要寧靜呀！妳同我搵多條仔去陪佢呀！
到咗六月初，當然都係搵唔到第四位旅伴，而且為咗慳錢，最後阿寶決定兩女一男同一間房！於是係時候，要同傳統認為男女授授不親嘅阿媽交代……
「筷子做乜又拎咁高呀？」同阿媽食飯，又被佢咦哦我。
自從初中貪得意重新學揸筷子之後，唔知係為咗就力定係乜嘢，越揸越高，到阿媽發現嘅時候，我已經變唔返舊底阿媽教果種揸筷子方法，頂多無揸到上頂，但點都揸到八分高；而聽講……
「筷子揸得越高，嫁得越遠呀！妳想玩乜嘢？」
「無無無，咩都無玩」眼都唔眨講咗個大話，玩？一次玩咗兩條台灣仔啦！而家仲有一件嚟緊頭！雖然未必有事發生……
「好似阿愷咁過咗去美國就唔返嚟，掛死佢呀媽！」阿愷係我青梅竹馬，去咗美國讀大學，從此一去無回頭～
「關咩事呢，返嚟賺兩皮，喺果邊賺八皮，傻嘅先返嚟啦！」
「總之妳返咗嚟就唔好又心思思啦」嗱嗱嗱！我想講，我要同阿寶同一個台灣仔去大阪玩幾日啫，唔係去咗唔返！
阿媽聽完吓咗一聲，問晒前因後果，就語重心長咁講：「妳都大個啦，自己對自己負責啦！」
我會！放心我真係會！！只係無講出口個原因，係我已經一朝被蛇咬，真係怕咗遠距離戀愛啦！
但係偏偏，呢條「遠距離戀愛之蛇」，咬住我唔放……
再次見面嘅時候，係喺全亞洲最大最繁忙嘅機場……香港赤鱲角機場。
對於第二次離開台灣嘅阿南嚟講，跳級仲要挑戰一個人入境，難度實在太高，於是喺裡面足足轉咗一粒鐘，先至辛辛苦苦咁出到嚟接機大堂；見到面嘅時候，我都等到就死咁濟，於是大家都好無情咁say咗個hi，就搭車出去市區。
果晚阿南訂咗重慶大廈嘅一處住宿，當我帶住佢企喺大廈正門入口，我先意識到果種不得了！不經意就講咗出口：「好危險的感覺！」
「我也覺得！」抬頭阿南眼都凸埋，不過既然錢都俾咗，就唯有住啦！
於是因為唔放心，就咁開始咗我地嘅SMS交流……
「你還生存嗎？」我返到屋企，就發信息俾阿南。
「我把自己反鎖在內了，應該是安全！」
「好吧！明天別遲到，不然我要報警了！」
「妳先報好了，好可怕！」
不改搞事本色，睇嚟呢個trip都係離不開嘻嘻哈哈啦！
的確，我地呢三人組，又真係玩得幾投入！幾乎從頭笑到尾，一坐低就嘈到拆天，傾咗好多好多，樂趣又多多！
第一晚大家買咗一堆宵夜返酒店之後，先發現阿南係個日劇宅，返到房第一時間開電視、開啤酒，一邊飲一邊煲日劇！喂大佬，無字幕喎！日文呢家嘢我同阿寶都唔掂，所以當阿南對住個電視喺咁評論嘅時候，阿寶轉頭同我講咗句：「好嘈呀」
我就被佢點咗笑穴，覺得呢條友仔，認真過癮！
「你平常在家裡也這樣對著電視自言自語啊？你家人不會覺得你很吵嗎？」
「我自己一個人住呀！」
話說我呢個人花得太多時間喺工作上，所以某程度上我係一個生活白痴，首先對於錢銀極唔敏感，頭先餐飯幾錢呀？俾完就算㗎啦！一斤菜幾錢呀？我唔買餸㗎喎！然後家務、電器乜乜物物，我要感謝我媽同工人姐姐，都唔到我郁手，頂多幫手換燈膽！
所以當發現阿南自己一個人住，買樓供樓買傢俬電器俾水電雜費家務一手包辦，我真係從心底仰慕！另一方面，阿南亦都繼續做大佬，當我同阿寶用英文搞唔掂嘅時候，佢就會主動出馬，少少日文加身體語言擺平！就覺得其實阿南都幾好呀，係個難得夾得埋嘅旅伴，下次旅行都可以再約埋喎！
「妳們兩個，去田邊blah blah blah blah blah blah」
「吓？！」去到京都雖然都係好城市feel，但鐵路經過都係見到農田，阿南就忽然爆咗句聽唔明嘅句子
「我說，偷拔葱嫁好尪！尪是老公的意思！」
「什麼屁話呀？！小偷還嫁好老公？！」
「厄就老一輩這樣講呀，順口溜！台語來的學起來」
當我好認真咁學講嘅時候，阿寶問咗一句：「那你是好老公嗎？」
下一秒，兩條女四隻眼都好清楚咁睇到，阿南望咗我一眼，而果一眼，係奇怪嘅一眼！
令我諗起，謎謎果個複雜嘅表情……喂又嚟？！
（待續）
她的700公里的距離－遠距離戀愛真人真事改編(不定期更新)
這裡的故事，全都是真人真事改編、有關遠距離戀愛的故事！
http://miu-nan.blogspot.com/2018/07/700.html
這裡的故事，全都是真人真事改編、有關遠距離戀愛的故事！
http://miu-nan.blogspot.com/2018/07/700.html
