第06～10集：https://goo.gl/6L86yt
第11～15集：https://goo.gl/so2NJe
第16～20集：https://goo.gl/t3fAAc
「望妳喎」
「咩呀？！」雖然係廣東話，但阿南對咗我地兩三日，已經聽得明「咩呀」兩個字，於是識得回應「咩呀」嚟扮傻帶過！！
不經意就咁諗起咗三個男過客，所以話呢個旅程又邊有咁好死？！即日就手機響兩次！玩咩？咪就係有兩個面皮十呎厚嘅前男友，好似約埋咁，分別send SMS嚟，翻我千層浪囉！
首先係果位玩遊戲嘅沈郎阿安，話路過赤嵌樓，「想我」！
然後係果位被我莫名其妙飛甩咗既前男友，又嚟賽後檢討，話佢積極改進中……
做咩啫？一個為咗玩遊戲，一個失去咗先識珍惜！
轉手掉俾阿寶睇，咩係好朋友？就係一邊指住嚟笑一大輪，一邊俾你一個大擁抱！
之但係一個hug都係唔係好夠，妖！情緒又玩過山車，夜晚食完飯，喺某間舖望住啲手繪領呔發呆，就出事……
「想買給誰？啊！我知道！前男友！」阿南知道我分咗手，不過未知內容，竟忽然就拎件事出嚟搞。
「分手好久了」
「那一定是想他了！」果下真係好唔老黎，眼神咩嘅乜都拋諸腦後啦！
同阿寶講咗聲，我就離咗隊……
坐響京都街頭，所謂嘅古都，市中心一樣繁華，但明月漸漸西移，店舖都要閂門，四處開始安靜落嚟，但我內心吵鬧到街市一樣，為何幾乎每次飛出香港，問一句「客夜怎生過」，總係如此多愁？
抬頭望向漆黑天空，係喎，妳會落雪㗎！何以心底六月飛霜，妳卻落雨贈慶？
前男友唔識珍惜自己，阿安唔識珍惜自己，然後帶住果份傷痛，已經推走咗謎謎，而家大概都嚇窒咗阿寶同阿南，仲想要推走幾多個關心自己嘅人？
女人，真係唔可以太強迫自己，就算無膊頭，就算自己一個人，都係要喊下先解決到，於是係果個陌生嘅城市，唔啜泣啦，㩒咗免治馬桶果個膠到爆嘅沖水聲，我聽咗好耐都無出現過嘅扯蝦式肺音，雖然只係兩下咁大把，但心情真係爽好多！
打開門對住塊鏡洗個面，由黛玉葬花、變返一條女漢子！好啦！返去啦！
返到酒店房，無開電視，超級安靜。阿寶埋嚟摸咗我個頭一下，就無人敢講嘢，但我知道，阿寶應該有大概講咗我嘅事俾阿南知。
呢樣我又唔介意佢講嘅，的確係我嘅情緒影響咗人，要解釋一下。
而呢幾日發現阿南都係個唔錯嘅朋友，只係咁啱撩到我著火啫，做friend就係咁，要踩吓底線，先至更認識對方，只不過，「對唔住」呢家嘢，都講唔清係邊個撩著邊個，亦都無謂講道歉啦！
於是剩低嘅旅程，大家都好似無事發生過一樣，瞓醒一覺，繼續嘻嘻哈哈，就結束咗京阪之旅。
返到香港，我地出海關，阿南就去轉機返台灣；一轉身，今次就完全無諗過要回頭，係阿南身上，有兩個人嘅身影，我暫時仲係揮之不去嘅身影，而「台灣仔」三個字已經係原罪，唔好再搞我啦！
「京阪好唔好玩？」
「OK啦！啊！有買你食呀師傅！」從日本返嚟香港，下一個週末午後，阿鴻約咗打波，天氣開始熱到爆，追一陣波我就要坐：「咁熱，睇怕要抖暑啦！」
「馬咩抖暑」阿鴻難以置信咁望住我，大概覺得我明明年紀細佢六年，點解體力咁差：「轉打壁球啦有冷氣」
「唔追波啦我咁耐都學唔識，我去clubhouse游水算！」
「我都想有好啲泳池嘅clubhouse，而家果個唔係幾好」
「換啦！」
「想呀！陪我睇樓呀！」
講到呢度，就忽然諗起阿南，廿幾歲靠自己就買咗樓，真係好叻，我好羨慕，不如都嘗試下走出舒適圈，搵個更大嘅責任去背負一下，試下買樓都好，於是就係咁好單純地就跟咗去睇樓，但原來成件事根本唔單純！
「呢位一定係未來太太啦！」
聽到地產經紀咁講，我大動作回頭眼都凸咁超住佢：「No！」
好在佢都唔蠢，講咗句「唔好意思」，就禮貌問我點稱呼。
只不過成個氣氛就尷尬到爆，阿鴻無再講過嘢，全程就我同地產經紀問答大會。
「中意果度？」睇完樓，擺脫地產經紀，坐低喺咖啡廳，阿鴻先變返正常，拋出一個問句。
「麻麻地」一手用手機計數，一手喺筆記簿寫寫寫，我忙住計我要預幾多首期同儲備金去買樓，完全無望阿鴻，自然亦無留意佢嘅情緒……
「女人計乜啫，妳唔洗買樓喎！」
「女人就唔可以買樓咩？」
「咁妳計掂未呀？」
「自己一個有啲困難，無咗份工就頂唔得耐，有個partner穩陣啲……」
「女人都係靠男人養啦……」
「點解一定要靠男人養啫？」嚟到呢下我先抬頭望阿鴻，佢望住我，欲言又止，我先嚇然發現，原來我地兩個人嘅關係，非常瞹昧！
首先我地無共同朋友，所以每次出去都只有兩個人，無數次食飯、食tea、飲咖啡，一俾錢嘅位我都爭輸，話唔係男女朋友？邊個信呀？！
但作為當局者，我自己就一直覺得係一般朋友……
「咁，我認同若果有打算生小朋友嘅話，係男人要養晒嘅，但我唔係果種甘心樂意相夫教子嘅女人囉……」一方面用平靜嘅語氣緩和氣氛，一方面都將我心底嘅想法講出嚟，淨係「唔肯生仔」呢四個字，基本上已經可以打沉一票男人！
「妳未到果個年齡啫，到時到候又會想㗎啦！」
聽住阿鴻說服我，忽然分唔清究竟阿鴻喺當我o靚妹仔，定係乜嘢！原來發生咁多事之後，我都係未識分啲男人係度諗乜！
「嚟啦！條式唔係咁計！」可能想緩和氣氛，阿鴻轉咗我本筆記簿，就搶咗我支筆教我計……
事實上阿鴻好叻，教我好多嘢，每次「約會」我都有得著！有friend如此點可以錯過？於是佢約打波、食飯，我得閒就照出去囉！
京阪之旅之後，先發現原來阿南係輪班，所以我地嘅時差，都只係久唔久先會出現，於是好多時夜晚上網，都會見到佢上線，仲會主動嚟𢲷吓水吹。
加上我地都忽然之間踩咗入另一個online game嘅坑，所以溝通嘅機會就更多了！
你可能無玩過online game，一群人一齊喺同一個網絡空間打機，仲可以分黨分派，叫做「公會」，同一個公會嘅好處，就係可以交換資源，武器、裝備、林林總總都可以交換，只係我唔係成日玩，基本上無嘢可以回饋，但阿南都義無反顧，兩肋插刀，話俾就真係留俾我！
「給我拼圖！」
「留了啦！妳不是要去開會嗎？」
「有成員臨時有事，取消了」
「啊！那就休息一下呀，有空再領拼圖就好」
同阿南不著邊際嘅對話，會開始知道大家嘅生活日常、甚至生活時間表，不知不覺，相隔七百公里都可以咁熟，堅神奇，就係以前同阿安其實都無熟成咁！
「啊！我去看房子了！香港買房真的不容易啊！」
「妳自己去看？」
「跟朋友，比我年長的一個哥哥，他有買過房子所以能教我很多」
就咁俾阿南知道阿鴻嘅存在，果時都只係單純陳述事情，無諗得太多；但係時間一長，同呢兩個男人有更多對話，將對方由「平面認識」轉化為「立體認識」之後，點點線線連繫起來，我呢隻傻更更先終於意識到，有啲感情喺度醞釀緊！
「俾妳㗎！」涼秋終於嚟臨，諗住可以多少少戶外活動嘅時候，阿鴻去咗轉法國出差，返嚟拎住個名牌紙袋，一嘢就遞俾我！我雖然未買過果隻牌子嘅產品，但價錢大概幾多我都係心裡有數嘅，於是一手就推卻：「玩我咩師傅，咁厚禮，我唔可以收！」
「妳個銀包唔係爛啦咩？換啦！當係聖誕禮物！」
推嚟推去，最終都係塞咗入我手！平常食飯飲嘢係阿鴻埋單，都仲可以話因為佢收入係我好幾倍，所以唔介意俾gentleman風度；但呢一云真係堅大手筆！
「喂我問你唷！如果你很有錢，你會隨便買名牌給女生嗎？」夜晚返到屋企，拎住個名牌銀包出嚟反來反去，諗爆頭，見到阿南上線，就掉咗呢個問題俾佢。
「發生什麼事？」無回答我嘅問題，阿南就反問我一句。
「有點不知道有錢的男人在想什麼」
於是我將呢單嘢話咗俾阿南聽，佢嘅答案聽落又幾合理：「妳也說他有錢，在他眼中那只是小禮物而已，只是妳把它放大了」
放大嘅睇怕唔係禮物咁簡單，而係感情，經歷之前嘅事之後，我好似驚弓之鳥一樣，風吹草動就開始諗諗諗諗諗……
阿鴻係追緊我？但我好似無乜feel喎，咁要繼續「約會」？
唔去嘅話就無friend做喎，去嘅話又算係「受溝」？
踏入呢種社會型嘅成年人之戀，究竟係我仲未識得處理，定係我受傷嘅程度比我想像中仲要深，連再次戀愛嘅「勇氣」都已經被磨滅？我得唔到結論。
而偏偏當我覺得向阿南傾訴，係閨蜜外安全又舒服嘅人選時，我實在太無意識，要去考慮阿南嘅真實諗法……
偏偏當我覺得向阿南傾訴，係閨蜜外安全又舒服嘅人選時，我實在太無意識，要去考慮阿南嘅真實諗法……
「你是覺得在於他來說，那些只是小錢，所以他不介意？」
「對阿，那大概是他不用思考就拿出信用卡刷的金額」
「他還說要請我去北海道耶！」果年我忽然想冬天去阿寒湖滑雪，計劃好行程之後，卻礙於無旅伴、住宿太貴而中止白日夢，點知阿鴻聽完，自告奮勇話陪我去，仲話旅費佢負責……
「那你想去就去阿！」
「去了就等於認了情侶關係了吧？」
「那麼大的麵包不要錯過呀，去阿去阿！」
一直處於閨蜜「軍師」狀態嘅阿南，忽然大手用力咁推，隔住個Mon都聞到陣怪味！而家諗返起，先知道原來係醋味！
「若他是想著交往，我答應去，卻沒有感情給他，那會傷害他耶！」
「妳顧慮那麼多幹嗎？就去阿！」
「這樣不對！」
「他自願的妳有什麼不對？！去阿！快去呀！」
果次係第一次同阿南嘈交，而且係一次好奇妙嘅嘈交，當下係覺得「搞咩呀！做咩事咁唔好老脾？」
結果隔咗幾晚小櫻同我呻，先發現有啲嘢！
「妳個friend呀！咩男人嚟架？！咁無風度嘅？！」
「邊個呀？咩事呀？」
「阿南呀！叫佢幫我留拼圖，死都唔肯留，叫我自己打！」
隻Online Game有四種拼圖，我、阿南同小櫻需要嘅拼圖都唔同，所以有多實係可以俾其他人，堅離奇！
於是安撫咗爆炸嘅小櫻之後，我上線問阿南要拼圖，佢繼續好順攤咁俾咗我，好似咩事都無發生過咁樣……點解留俾我就咁順攤，同小櫻就咁講嘢？係因為我係「某個重要人物」、值得有特別待遇？
忍住咗心入面嘅疑問，我就off咗line，主要都係唔想「打爛沙盆璺到篤」，無論係同阿南又好、同阿鴻又好，「說穿」一段關係對任何人都無好處，更何況我自己唔知道自己真正係度諗乜嘢！
係！人有時真係好搞笑，唔止精神同肉體係兩回事，就連精神都好似分裂咁，思想同感受係分開！我的確喺思想上覺得阿南同阿鴻都好好，但再深層「感受」呢，就係一個問號！反正人類大腦構造複雜，N個世代嘅科學家、思想家、哲學家窮一生喺度諗諗諗諗諗，都未有一個可以說服全世界嘅結論，我一個小女子又點會咁容易可以跳得出框框！
呢類剪不斷、理還亂嘅事，好煩、好想逃避，感覺呢次一選擇，就會一生一世……
睇一睇仲有唔少假期喺手，一炮過請咗佢，買咗機票，就返去以前讀書嘅美國，多得呢個舉動，我先有機會同「自己」好好對話……
逃離香港嘅第一日好長，超級早機，為咗調時差我無瞓過覺，上機縮埋瞓下醒下，應該有瞓到四、五粒鐘。到達美國，落機一副殘樣，洗個面，除咗被我調戲佢「有無男朋友介紹」嘅鬼佬海關之外，第二個面對面嘅人，我已經對咗佢至少十五年：我嘅青梅竹馬，係，就係去咗美國唔肯返香港嘅阿愷！
在此要奉勸咁多位，唔好以為青梅竹馬有乜咁浪漫，實際上係知道對方太多事，有太多瓜瓜葛葛同恩恩怨怨，好似我同阿愷咁，就算曾經因為年少無知，做出唔少讓雙方而家諗返起會心頭一暖嘅事，但無錯絕對係都有好多嬲L到爆炸嘅事，就好似兄弟姊妹咁，咩感情都有啲，所以頂呀我係絕對唔會將佢當對象睇！
時差加瞓唔好瞓唔夠，我攰到爆炸，阿愷就決定買個pizza返屋企食，食完其實仲好早，我就攤喺梳化，睇住阿愷坐喺梳化前面塊地毯上執嘢，一邊同佢吹水，講咩？就係互相套吓近況，加埋感情世界咁啦！
「喂你好似有女朋友？」
「妳又知？！」
「Facebook見到你啲豬朋狗友寸你！」
「係呀，都一排啦感情穩定。咁妳呢？我聽我阿媽話妳飛咗條仔」
哇太outdated啦！於是我大概講咗，有兩個男人疑似追緊我，但我唔知自己想點，又唔想拖拖拉拉。
「或者妳更需要嘅，係學吓啲大人嘢，嗱呢本啱妳」
聽完我講，阿愷轉手遞一本雜誌過嚟，我接咗睇一眼就反手向佢個頭掉過去，好明顯係一本醎書、仲要係日本醎書：「趴你個街咁多人死唔見你死嘅？」
「哇珍藏呀！我friend去日本幫我買架！」
「你啲男人心入面就係歐派（胸部），歐派有得裝假㗎！日本幾多偽娘，一除裙下面同你一樣一條，我驚你縮到以後都舉唔起！」
「妳……好狠毒！」阿愷指住我，其實兩個都忍笑忍到出晒面，一句「頂你」就笑到反肚。
阿愷雖然係亂咁噏，但其實我都有女性朋友同我講過，佢試過因為性而分清楚自己真正中意一個人有幾深；但係在於我嘅角度，性係肉體本能，情卻係靈魂悸動，用肉體層面解決靈魂層面嘅嘢，不妥也不安，要用咁嘅方法解決？！咁我寧願繼續被困擾啦！
「定係妳只係好賤格咁收兵扮女神咋？」
若然我真係收兵，就唔會咁煩惱諗咁多啦！阿愷呢啲人真係唔搞佢唔安樂：「妖夠你賤？等我打俾你女朋友，同佢講我先係正宮，叫佢行開啲！」
「死呀妳！喂！！！」一手搶咗阿愷部手提電話，兩個年齡加埋都半百嘅人，坐咗時光機返到小學時代，一邊大笑一邊追追逐逐。
（待續）
++即刻閱讀第26~30集++
她的700公里的距離－遠距離戀愛真人真事改編(不定期更新)
這裡的故事，全都是真人真事改編、有關遠距離戀愛的故事！
http://miu-nan.blogspot.com/2018/07/700.html
她的700公里的距離－遠距離戀愛真人真事改編(不定期更新)
這裡的故事，全都是真人真事改編、有關遠距離戀愛的故事！
http://miu-nan.blogspot.com/2018/07/700.html
