第06～10集：https://goo.gl/6L86yt
第11～15集：https://goo.gl/so2NJe
第16～20集：https://goo.gl/t3fAAc
第21～25集：https://goo.gl/BR5z9g
喺阿愷度借張梳化瞓咗晚，第二日我就一個人出發去以前讀書嘅地方。
觀光、返去以前成日去嘅地方睇吓，又約吓老師約吓舊同學吹水，盡情咁迆！
喺美國出咗張電話卡，傍晚就收到阿寶越洋來電：「喂！早晨！」
「哇幾點呀？瞓唔著？」
「睇日出呀！」原來單身嘅阿寶，同我介紹俾佢嘅一個男性朋友搞浪漫！我望下日曆，未到聖誕喎，駛唔駛咁Love is all around？！驚訝之餘，被知道我點解「走佬」去美國嘅阿寶問我諗成點。
「未呀，靜下添啦……」
「啱啦，靜下迆下，啱咪見多啲，唔啱咪見少啲囉！」
緣份有時好奇妙，幾個人差唔多時間出現，相處都舒服又開心，就同時對幾個人有好感；但係一講到「談戀愛」，或者就會猶豫到底係中意邊一個，畢竟彼此相知相惜、在乎佢嘅想法，又或者嚮往佢嘅人生，都係中意嘅心情！
但若講到真正嘅、認真嘅愛情，我哋只能夠對一個人負責，而果一種「中意」應該係最特別嘅，就係你思前想後，仍然掛念、戀慕嘅果個人。
於是安靜咗兩個禮拜，無見面、無上網，生活圈缺少咗阿南同阿鴻兩個人之後，我終於發現自己真正會掛住嘅男仔，就係阿南。
無錯阿鴻都好唔錯，投契、有風度、又有錢，若然再現實啲，的確係阿南形容嘅「大麵包」，港女發夢都想要嘅理想對象；但係愛情就係咁樣，無法用外在因素衡量，我唔可以自己呃自己！
果一日，天空灰灰暗暗、飄住雪花；已經關門大吉嘅圖書館外面停車場，只停咗一部藍色Ford Focus，我一個人瑟縮喺果架車入面，靠圖書館嘅微弱WIFI上網，收電郵、upload下相、忘卻時間之後，就收到阿南嘅信息：「我想來香港，可以嗎？」
「可以嗎」這三個字非比尋常，阿南大概認為我已經隱約感覺到佢嘅心意，所以先會有咁樣嘅疑問句。
快速打咗一句「你想來就來吧，不用我同意」，㩒send之前，又猶豫不決，最後刪咗後面一句先send咗出去，唔等回覆，即刻就熄咗手提電腦。
清楚自己心意，我反而更不安、甚至煩燥！係！你估啱啦！就係因為阿南係個台灣仔！
真係死症原罪……同阿安嘅種種又浮現喺腦入面；望出玻璃窗外，原來雪已經停咗，空中風吹雲開、露出一小片黑漆，一缺盈月透著亮光；同一個時間、不同嘅日與夜，快咗十二小時嘅時區處，係一個比呢度溫暖得多嘅早上；而果一個陽光明媚嘅古城台南，有兩個人嘅名字，深深刻印喺我心中……
其實要克服嘅，又點止我自己嘅心理障礙？
食完早餐，望出去，今日太陽終於出嚟，我就開車去咗楓樹湖，有好幾個同學住喺果邊，果然就俾我約到其中一個同學Justin，當年佢去咗西雅圖讀書，留咗女朋友喺度遠距離戀愛。
同Justin坐喺湖邊曬太陽，一邊聽住佢嘅「過內人」失敗經驗……
「很難啦！太少見面，感情就容易結冰」
Justin伸完懶腰，又伸長咗雙腿，對比佢個放鬆到爆嘅姿勢，正襟危坐嘅我明顯緊張：「有第三者？」
「等不到第三者，就自我了斷了」Justin連頭都橫喺椅背，好似講緊人哋嘅事一樣：「會跟自己講，為何那麼痛苦、愛一個無法常常見面的人？她今天見了誰、發生了什麼事？疑神疑鬼的；然後自己的開心與不開心，隔空是要怎麼跟她分享？上個網打個電話，跟實時的擁抱悄悄話根本兩回事！觸不到、摸不到，就慢慢覺得放手好了。」
係㗎！遠距離戀愛真係唔容易㗎！我當初到底係邊度嚟嘅勇氣，就飛去高雄㗎？定係其實一切都唔好諗，等船到橋頭自然直？
一難未解、一難又來，Justin嘅經驗又俾咗我另一個問題：「我跟她的確很了解對方，但時間會改變人心，到頭來發現她的想法跟我想的不一樣，遠距離讓想法都無法同步，妳覺得呢？」
真係問題一大堆！少見面，就代表能了解對方嘅時間都少！問我了解阿南嗎？老實講邊度了解？但就係中意！掉轉頭阿南一定都係一樣，中意，但根本唔了解我。
咁樣講法，戀情要拖幾耐？而且好有可能拖到最後，都係分手收場！
向Justin笑笑表示我明白，但我無話佢知發生咩事，若話俾佢知，大概都係勸我「唔好」。
至於我自己，都係果種經過風險評估之後，通常會避開遺憾嘅人種，尤其今次，我自己已經有過一次遺憾嘅經驗，今日又聽咗Justin嘅遺憾，睇怕無返咁上下決心，都好難打動到我。
講到一半，Justin嘅爺爺就拎住釣魚用具出嚟，喺楓樹湖未結冰嘅湖面同我地一齊垂釣。
安靜嘅等待令人領悟，戀愛其實都似釣魚，強行伸手係無用㗎，要用適當嘅工具同誘餌，仲需要時間同耐性，有時仲需要啲技巧、經驗同運氣，先會有收獲。
而遠距離戀愛所需要嘅耐性就更多，無法常常見面，無論相互了解、相互信任，喺戀愛中修成都係困難加倍，果啲考驗，我哋熬得過嗎？
世界有個真理，叫做「計劃敵唔過變化」，有時真係無謂諗太多，反正點都唔會有結論；而且緣來緣去，前面幾朵桃花已經足夠說明，有啲嘢無人可以控制，不過每一個過客，都能夠俾你一啲體會、一啲學習。
喺雪糕店買咗三個氫氣球，企喺稍稍積雪嘅田間，放走第一個球，藍色天空飄著紅色，我要多謝前男友，教我要愛自己。
第二個球係綠色，如同記憶中億載金城外嘅一片綠色樹林，我要多謝阿安，教我眼睛要雪亮一點。
第三個球係藍色，印象中旗津黑沙灘外海天一色，我要多謝謎謎，教我注意唔好傷害到自己無意嘅人。
同過去劃分界線，就要向前踏步！
上機返香港之前，拒絕咗阿鴻嚟接機，既然已經思考清楚，就無謂俾人哋希望。
然後無兩個星期，就又返到香港機場，迎接咗阿南。
真實面對阿南，四目交投，非常清楚愛情又一次靠近；上一次係自己好勇敢咁往前尋答案，但今次完全唔敢郁，咩叫敵不動我不動呢，竟然喺呢個叫做無戰爭嘅香港，忽然體會到！我知道，平日膽生毛嘅我，呢一刻無膽到爆！
四周熙來攘往，但完全無礙我地兩個人你眼望我眼，其實應該唔係望咗好耐，但有感覺係時間停咗，直到我回過神，已經喺阿南嘅懷抱入面，互相聽住對方緊張嘅呼吸聲，心臟跳到就嚟彈出嚟……
係，我地嘅開始，話簡單唔簡單，話平凡又唔平凡，
夾雜住往事，夾雜住回憶，帶住少少傷痕，
無浪漫表白、無臉紅解釋，全無言語，
自自然然就開始咗！
然後用咗三日時間，我地喺香港肯定咗彼此心意，就又分隔兩地。
但係甜蜜兩個星期之後，阿南就失咗聯，三日無上網，手機訊息已讀不回……
果刻先發現，若然阿南要避我，情況同阿安係一樣嘅，我唔知佢屋企人或朋友嘅聯絡方法，亦未知佢確切住址，要結束、直接人間蒸發就可以。
啱啱開始嘅感情未係好深，但係我自己都覺得自己冷靜得離譜，無問阿南發生咩事，甚至無再傳任何訊息俾佢，你話我倔強又好乜都好，就係唔會糾纏感情，亦唔會求一個「為什麼」，要了斷？係就快啲！
阿南整整失蹤咗三日，有睇信息，代表人未死，咁唔回覆係咩玩法？
雖然因為殺價超人嘅關係，打IDD已經變得好平好平，但係我過唔到自己嘅自尊心，咩事都好，無謂逼人哋回覆我。
到咗第四日，正當我覺得睇怕可以就咁算嘅時候，阿南終於上網浦頭，溫暖嘅對白竟然好似無事發生過一樣，忍唔住心入面嘅問號，我就問佢前幾日做咩……
「我中諾羅病毒了……」
咩嚟㗎？！第一反應上網查啦！先知係急性腸胃炎！
咁多日，為咗餓死啲菌，佢原來無食過嘢，一個人承受；而果個完全無追問佢咩事嘅我，唔止好唔抵咁亂諗咗嘢，仲顯得非常之涼薄……
喂！幾唔舒服都好，手機發個SMS話我知都可以卦？
果吓先明白啲人話台灣佬大男人主意、愛面子，真係有啲跡可尋！
於是um咗阿南一輪，互相講明咗出事一定要通知對方之後，就過渡咗我哋戀愛嘅第一個難關。
「認真㗎？」呢晚姊妹坐埋食飯，仲有咩好講？我同阿寶兩個人都開始咗新戀情，當然係互吐真心話。
「咁妳係咪認真？」阿寶無答我嘅問題，就反問返我，好明顯，我哋諗法一致。
「即係咁，有時啲嘢，未試過又唔知點啫」講出彼此心聲，但其實受過情傷之後，仲有謹餘嘅呢份勇氣，直頭係似戰咩幾百咁，拎住把刀殺啊！
「阿～妳心口個『勇』字返嚟啦喎！」阿寶笑住切牛排，分咗截俾我，就切咗一截我塊豬排交換：「咁你哋點溝通？SMS啦喎？」
「叫佢買咗個webcam，我地玩skype！」
要多謝科技發達，其實今時今日嘅遠距離戀愛，已經多咗好多聯絡方法，再唔係「千里之外你無聲黑白」，唔洗搞到好似納蘭咁自嘆「爭教兩處銷魂」！
我同阿南嘅方法，係約個時間，各自買外賣返屋企，準時上網開skype一齊食！
唔好睇小一齊食飯呢個舉動，好多話題、問題，就都係喺餐桌上面浮上枱嘅，所以食咗幾次skype飯，我同阿南嘅了解就一直升呢～
只不過我地同時亦覺得，要增進同維繫感情，都必須要久唔久真實見面，於是我哋計劃咗下一次見面嘅地點同日期……
「喂！唔好送上門呀！」聽到我要去台灣，阿寶提醒我。
「傻豬嚟嘅，我哋去台北！」
再一次，安全感低得很，好似要考驗大家、考驗呢段感情一樣，我要求阿南，兩個月後喺台北見面，一個遠離台南、香港，我地都唔係太熟嘅地方……
台北交通發達，基本上係一個唔洗點plan、可以去到先算嘅地方；選擇去台北係正確嘅，因為一嘢就睇到幾樣嘢！你哋呀～戀愛緊果啲！係唔係遠距離都好，都可以參考吓，有時呢啲嘢若果大分歧，都幾大劑！
首先係時間運用，有啲人中意排滿個行程，而我哋呢都係唔中意趕頭趕命嘅人，所以唔會一日太多行程，即係咁，唔係十八廿二，半夜衝誠品？要扮文青都唔好咁啦搞唔掂！
然後係金錢運用，就發現有啲唔同啦，我係用錢買時間同捷徑嘅人，阿南係用時間留錢嘅人，訂個住宿，會幾個網站比價，搵個最平嘅嚟訂！而我，就淨係識搵官網碌卡咋！
至於行程選擇，景點、購物點可以一遊但唔會長，長就最好親親大自然，咦，呢樣我哋又啱嘴型喎！
於是如此這般，話咁快就到出發日期，約喺桃園機場見面。
未起飛嘅時候，忽然諗起上一次自己一個人去台灣，就有人玩失蹤，笑笑拍一拍塊面，係，阿南都玩過失蹤，但今次我唔會再次經歷，原來由阿南追到香港開始，到大家兩個月內用Skype聯繫，不知不覺間，對呢段感情已經有咗信心。
果然一出禁區，就見到阿南等我，然後充份體會，點解有啲人會話台灣男仔比香港男仔更識得「放低身段」，就係因為，妳個袋幾女人都好，佢都會一嘢就拎咗去揹！
第一次接受呢種「公主式待遇」，然後再十指緊扣住妳隻手，帶妳去搭車！
果下妳真係會覺得，抵呀！係超值果種「抵」！喺香港同一個年齡層或以上年齡層，搵唔到呀大佬！
係㗎！女人要求有時簡單到你唔信，只係想男人做一個領導者！被男朋友帶住去呢度、去果度，唔識去唔緊要、行錯路都唔緊要，只要有做過功課，就心意滿分！就連過條馬路，都有打醒十二分精神帶住妳行，令妳覺得好安心、好有安全感，其實已經可以跳level！有一刻真係覺得，我可以蒙住對眼過馬路，呢啲，就叫做男人嘅成功啦baby！
遠距離戀愛就係太容易令人產生幻覺，因為少見，好難摸透對方為人，空白嘅部分好容易會自行填充，即係自己腦補咗！
所以我不斷提醒自己要認識真正嘅南，亦都唔好隱藏真正嘅自己，就趁見面嘅時間，多互相了解一下。
慶幸嘅係，雖然短短三日，但我feel到真實嘅人、真實嘅情感，而唔係堆砌出嚟嘅美夢，感情一下子升溫，滿足咗安全感，於是我終於肯乖乖地「墮入愛河」。
係㗎，去台北之前，對呢段感情仲係好有保留，喂～700公里遠呀！要腳踏兩條船，容乜易呀？所以我緊記咗「唔好沖昏頭」呢五個字，觀察、審視、證實，都係要實際見面先至可以確定！
如是者，每2~3個月見一次面，今次我去台灣、下次南嚟香港，幾次之後仲見埋家長；然後有一次因緣際會，我著起咗婚紗，喺香港某個公園，影咗輯只有新娘嘅相……
（待續）
++即刻閱讀第31~35集++
她的700公里的距離－遠距離戀愛真人真事改編(不定期更新)
這裡的故事，全都是真人真事改編、有關遠距離戀愛的故事！
http://miu-nan.blogspot.com/2018/07/700.html
她的700公里的距離－遠距離戀愛真人真事改編(不定期更新)
這裡的故事，全都是真人真事改編、有關遠距離戀愛的故事！
http://miu-nan.blogspot.com/2018/07/700.html
