著起婚紗，係好多女人嘅夢想；我嘅第一次婚紗加新娘化妝，獻咗俾一次私人攝影。
無特別興奮，應該話無特別感覺！就影相嘛！只係攝影師俾我睇返嘅時候，覺得都幾靚喎，就send咗幾張俾南睇。
其實，我無咩意思，唔係催婚，因為我自己係怕婚姻嘅人，隔住個mon亦唔知南睇到嘅反應，要事隔一個月輪到我飛台南，去到阿南屋企開電腦，先發現其中一張相已經變咗做wallpaper……
「這是什麼？！」睇到嘅第一個反應係嚇窒咗，明星咩？做wallpaper？！
「很漂亮呀，我喜歡……也很期待……」
「這算是求婚嗎？」
「……求婚會更正式一點……」
話題到此，就兩個人都沉默咗，或者因為我地一齊都已經有一段時間，的確到咗要諗下一步嘅時候。
遠距離戀愛見面成本極高，除非其中一個係因為出差而飛，見面成本大大減低，就唔需要作長遠考量。
但我同南每次見面，都係用自己嘅假期、用自己嘅錢，老老實實，見面成本好高吓㗎！
飛嚟飛去對於發展關係嚟講，係一項巨大投資，講到投資就真係「估王」上身~~
若然只屬短期關係，無未來嘅話，絕對宜快速斬纜，開心過就算；但若然肯定長期關係，為咗更長遠嘅雙方實際利益，不如慳返個錢、進入人生另一個階段啦！
所以簡單啲講，呢個moment就只有兩條路：結婚或分手
呃……咁都有第三個option嘅，如果你好有料好叻搵到當地公司請你，咁就唔洗結婚都可以過去住，但對於呢一點，我同南都無自信做得到。
於是又回到結婚定分手嘅問題，唔好話我一針見血，去到某個位，垂死掙扎都無用，只係遲定早嘅啫！未想結婚，但更唔想分手，但係結婚嘅話，邊個移民先？
移民係要放低晒所有嘢！所有！家人、朋友、生活圈、生活習慣、工作、前途甚至興趣！
興趣都要放棄咁嚴重？我唔係吹水㗎！我中意溜冰，一星期會抽一晚放工去，一個人去，但台南當時根本無溜冰場！
呢個只係其中一個例子，相信調轉頭，南都一樣會有需要放棄嘅事、有難以適應嘅地方，尤其係台南生活節奏慢，香港係快快快，淨係搭地鐵果條人多又快嘅扶手梯，南都用咗一段時間適應。由慢轉快，絕對唔容易；但由快轉慢就相對易好多。
果一晚深思熟慮過後，我自己知道，呢場戀愛若要做個取捨嘅話，要勇敢放棄一切、或者結束一切嘅果個人，一定係我。
咁啱呢一次嚟台南，我哋乜都無plan。
去咗平日阿南開飯嘅舖頭食飯，行咗大賣場，去埋街市，充分體驗咗台南嘅生活係幾咁……
苦。悶
台南版嘅銅鑼灣就係一幢新光三越！
旺角就係北門路、東寧路兩條街！
無蘭桂坊、無諾士佛臺、無happy hour、無鬼佬live band bar，頂盡有條海安路有露天茶座！
普普通通食個義大利粉set dinner竟然要350大元，擺碟係靚嘅，但食物只有大Ｘ樂級數，你話有義Ｘ屋級數我都無嘢講呀！
然後呢，我中意食嘅壽司貴到震又唔新鮮！
最慘嘅嚟啦！搵個早午餐、下午茶、咖啡廳，極少！！
於是成個trip，我只有五個字：「乜嘢鬼地方」？！
聽講人工又唔係高，平均2萬2，即係港幣5千5，若然用我喺香港嘅方法生活，餐餐出街、唔睇價錢食飯，又中意食西餐同日本菜，睇怕月月清袋！
當然呢啲嘢，我唔會講出口，但係阿南就開始咗講一啲以前唔會講嘅話題，例如話如果住台南，就一定要有架車；又介紹台南一般食店，晏畫1點就落場，然後夜晚7點又收工，食飯時間同香港完全唔同，話我可能會唔適應……
幫我對比咁多、思考咁多，暗示啲咩，我心裡有數……
返到香港，過住習慣嘅生活，忽然覺得真係唔係路！偏偏呢個時候，或者都真係差唔多right timing，首先係同我地差唔多時間開始戀情嘅阿寶傳出婚訊，然後係聽到呢個消息嘅我阿媽，問咗我個問題……
「你同阿南有無打算結婚？」
聽到我眼都凸埋，咦阿媽妳唔係驚我走咗去咩？但忍唔住好奇心，就繼續話題，睇吓阿媽諗咩先：「咁認真拍拖嘅，遠距離又無得同居嘅，所以終點都係果個㗎啦……」
「咁你哋諗吓啦」
將一切想法拋諸腦後嘅時候，忽然間連睇怕最難說服果關都過咗，於是淨返我一個人閃閃避避，就諗起咗美國，一個我可以好好思考、睇清楚方向嘅國度，就同南計劃，一齊去一次。
就咁樣，我哋繞咗半個地球，拎住唔同嘅入境簽證同護照，被海關叔叔問我哋兩條友一個香港一個台灣點解一齊嚟美國，搞事咁答佢我哋去賭城結婚，海關笑晒口答恭喜就歡迎咗我哋入境美國……
「有要去賭城嗎？！」
阿南呢種語氣同表情，我已經非常知道佢興奮到爆炸，似乎認為我向海關句老吹係認真，明白佢絕對有意同我結婚，我就忍住笑調戲佢：「你有準備戒指嗎？」
「沒……」
「那有戒指再說呀！」
就咁又終止咗呢個話題……
畢竟呢個旅程，並唔係要嚟討論幾時、喺邊度結婚，而係要嚟睇清楚、唸清楚，係咪要結婚，請唔好咁快跳級升上神壇！
果然，嚟美國真係啱㗎，好快就面對咗相處嘅問題，我地兩個人為咗開車，竟然有好大分歧！
但自問係個無能量去嘈交嘅人，就算有幾大道理，我都唔會一直講或者一直說服對方，講幾句就算，無氣繼續落去，所以基本上無嘈交，互相um完，就無下文啦！
至於嘈啲乜嘢？嘈乜其實都係一樣，若然要組織家庭，邊會有對錯之分？夫妻嘈交從來唔應該講道理，而係企喺對方角度，思考點解對方會咁樣，嘗試理解與體諒……
就喺呢段兩個人都收咗聲嘅開車時間，我驚訝自己思想原來已經跳脫到呢種程度，根本已經準備好結婚！
我甚至變態到喺度期待，幾時嚟一鑊杰嘅，可以令我哋爆火大嘈交？因為以而家咁嘅「方向」，好似嘈唔到啲咩喎！如果真係「撻得著大火」，一定超大件事，喂嚟呀整鑊杰嘅試試得唔得呀？
結果十日嘅旅程，基本上已經摸到會著火嘅位，雖然同好多情侶或夫妻一樣，有啲火並唔係一時三刻可以解決得到嘅分歧，之但係我地兩個人，都竟然非常有默契，而又忍得住果下「無法即刻解決」嘅痛癢，睇嚟無乜唔結婚嘅理由勒……
於是返到香港，經過金舖，南問我要唔要買戒指，就正式進入咗計劃結婚嘅節奏，而第二步，就係提親！
茶樓其中一張大圓枱，阿公阿婆阿爸阿媽坐喺對面，隔離仲有我細佬妹，悠悠然叫點心飲茶，並唔知道我地兩個，已經密謀咗人生嘅新計劃……
茶樓其中一張大圓枱，阿公阿婆阿爸阿媽坐喺對面，隔離仲有我細佬妹，悠悠然叫點心飲茶，並唔知道我地兩個，已經密謀咗人生嘅新計劃……
話說又要先解構一下我屋企，而家同枱嘅阿爸，係繼父，我媽同佢嘅婚姻，非常美滿，亦因為咁，俾咗我一個「真正婚姻」嘅樣版。雖然我媽唔會好似林心如阿媽講得出「一輩子太長，不能將就」之類可以紅爆瘋傳嘅金句，但佢地的確用行動教曉我，乜嘢叫做真正幸福嘅婚姻。
的確，好嘅關係，一世都唔夠，唔好嘅關係，一秒都嫌多！但係婚姻唔係拍拖，拍拖嘅話唔啱可以分手，婚姻唔到最後都唔可以輕言放棄，因為當你簽一紙婚書嘅時候，就係發誓要同甘共苦，而履行呢個誓約，需要好多包容同體諒。
婚姻嘅哲學其實理解簡單，但實行就好高深，我喺我媽同繼父身上，學到唔少嘢，而我呢個繼父，愛屋及烏，其實都有幫我向阿南做咗好多「測試」……
「你有錢的話，會先買房子還是先買車子？」
「房子，所以我買了！」
「若有你很喜歡的車子，卻沒有你喜歡的房子呢？」
「也是房子呀！比較重要！」
好似以上呢類對話，我次次都喺隔離忍笑，驟眼睇好似一啲都唔重要嘅無聊計，其實裡面全部都係生活嘅邏輯，而呢啲邏輯如果兩個人有大分歧，累積起嚟就係生活災難！
好在，講咗咁多，我同阿南只有開車一門，邏輯南轅北轍，一時三刻真係解決唔到，都係果句，慢慢嚟啦～
返到飲茶枱，見大家食得差唔多，阿南捉住我隻手，同我對望點頭，佢手心嘅汗，話我知佢要提親啦，我就又好衰咁忍住笑，無辦法，當初拍拖無表白、決定結婚又無求婚，要睇佢勇猛？咪就係呢一下，睇住佢同我阿媽點樣講囉！
「阿姨，我們打算結婚了，妳會祝福我們嗎？」
係！簡單到爆炸嘅直白，但我媽就即刻鼻酸紅眼框，係感動？唔捨得？都有啲咁啦！
然後就係好精靈嘅阿婆，話一陣去買本通勝度期，就咁就成功通過~
好啦搞咗咁耐，頂呢條友仔終於嫁得出啦！
往後就係懶係有plan準備結婚，但嚴重體驗咩叫「計劃趕唔上變化」！
如果所有都要兩個人去處理，會攰死苗＆南，然後兩個人有兩張嘴，又會攰死所有人！所以苗同南好快就有個共悉：一人搞一邊婚禮！
阿婆睇完通勝定咗日期，發現時間上趕唔切台灣擺完再喺通勝好日擺香港，於是定案先喺香港結婚擺酒，再遲半年先到台灣擺酒，中間時間充足，唔好趕頭趕命。
於是苗就開始計劃，首先梗係搞場地，其實好想睇住維港擺露天自助lunch，突破傳統唔好打牌、團體照、然後上菜，嚟round吹水合照滿場飛啦！
點知一問之下，個場地原來有人數下限！計一計咦無咁多人喎，變咗平均消費就好貴，於是唯有消咗念頭。
咁點呢？無得搞露天lunch，苗就完全零想法！因為基本上間間都一樣呀！場地又乜又七果啲，搞咁多花巧嘢做乜呢？嘢食好食緊要啲喎！
於是有日發現九龍灣展貿有婚展會，就抱一個齋睇心態，約咗我媽一齊去睇。
苗果日特登提早少少去，買定飛、睇定展場地圖，發現都不外乎啲婚紗相攝影、禮服租借、婚宴場地，最正係連美容纖體都有，真係生意難做、少少挐掕都可以入展場擺攤……話說展場如戰場，咁搞法，睇怕裡面啲sales全部都係精英中嘅精英！唔裝聾盼啞，每檔都要應酬嘅話，睇得幾多檔？於是畫定晒想睇嘅攤位，等阿媽出現，就「借聾耳陳隻耳」衝入去！
果然，行入去第一檔咋，問題就好似雪花一樣飛入耳，「幾時好日子呀？」、「要唔要婚紗或婚禮攝影呀？」、「擺酒要幾多圍酒席呀？」，我同我媽講，一概十問九唔應就啱啦！咪只會手上越嚟越多傳單，浪費時間又睇唔到想睇嘅嘢！
結果呢個展嘅收獲，除咗八折餅卡之外，就係俾咗個to do list我同南……
要搞婚紗相、搵婚禮攝影、搵化妝、搞婚前檢查，而最大鑊嘅，係搵場地！
咁樣行一圈，先發現通勝好日等於場地旺場日，幾間都已經訂滿！先知道乜咁多人結婚嘅咩？！sales仲話，好日嘅話，果一年都已經滿晒，而家講緊排兩年後嘅期！！
呢下啲危機意識先至「嘭」一聲爆出，香港係人多資源少，但係就連擺酒都要排兩年？哇！即刻覺得做香港人真係慘，日日食飯排隊、搭巴士排隊就算啦，買樓排隊、生仔排隊、入學排隊都聽唔少人哋訴苦……家下連擺酒都排隊？！喂！話說兩年後嘅好日，通勝都未出版喎！定係酒樓酒店用心良苦，知道而家離婚當食生菜，俾兩年緩衝期啲新人諗清諗楚呀？
（待續）
++即刻閱讀第36~40集++
她的700公里的距離－遠距離戀愛真人真事改編(不定期更新)
這裡的故事，全都是真人真事改編、有關遠距離戀愛的故事！
http://miu-nan.blogspot.com/2018/07/700.html
她的700公里的距離－遠距離戀愛真人真事改編(不定期更新)
這裡的故事，全都是真人真事改編、有關遠距離戀愛的故事！
http://miu-nan.blogspot.com/2018/07/700.html
